Mustaqilligimizning 31 yilligi muborak boʼlsin aziz Vatandoshlar!

"Аgrosanoat majmuida xizmatlar koʼrsatish markazi" davlat unitar korxonasi barchangizni eng ulugʼ va eng aziz bayramimiz boʼlgan - Vatanimiz Mustaqilligining 31 yilligi munosabati bilan chin qalbdan muborakbod etadi. Sizlarga mustahkam sogʼliq, oilaviy baxt, tinchlik-totuvlik, koʼtarinki kayfiyat hamisha hamroxingiz boʼlishini tilab qoladi.  

BMTning oziq ovqat va qishloq xo‘jaligi tashkiloti (FAO) xalqaro eksperti bilan uchrashuv tashkil etildi

Bugungi kunda, Birlashgan millatlar tashkiloti oziq-ovqat va qishloq xo‘jaligi tashkilotining O‘zbekiston Respublikasidagi vakolatxonasi (FAO) O‘zbekiston Respublikasi Qishloq xo‘jaligi vazirligi bilan birgalikda “СOVID-19 ga javoban kartoshkachilik sohasini tiklash va rivojlantirish” loyihasini muvaffaqiyatli amalga oshirmoqda. Ushbu loyiha ilg‘or tajribalar asosida barqaror kartoshka yetishtirish tizimini rivojlantirish, koronavirus pandemiyasining kartoshka tarmog‘iga salbiy taʼsirining oldini olish, kartoshka navlarini ro‘yxatga olish va urug‘lik kartoshkasini sertifikatlash tizimini takomillashtirishga qaratilgan. Shu maqsadda, loyiha doirasida 2022 yilning 22 avgustidan 26 avgustiga qadar FAO ning kartoshka bo‘yicha xalqaro eksperti janob Mehmet Emin Chalishkan O‘zbekistonda bo‘lib, manfaatdor tomonlar bilan uchrashuv o‘tkazish, shuningdek, Toshkent va Samarqand viloyatlaridagi nav sinov maydonchalariga tashrif buyurishi ko‘zda tutilgan Bugun 23 avgust kuni, “O‘zagroinspeksiya” huzuridagi "Agrosanoat majmuida xizmatlar ko‘rsatish markazi" davlat unitar korxonasida  FAO xalqaro ekspertini Respublika hududlarida urug‘lik kartoshkani sertifikatlashtirish bo‘yicha amalga oshirilayotgan ishlar bilan tanishtirish maqsadida “O‘zagroinspeksiya” masʼul xodimlari bilan uchrashuvi tashkil etildi. Tadbirda Agroinspeksiyaning Ko‘chatlar, meva-sabzavot va poliz qishloq xo‘jaligi ekinlari urug‘lari yetishtirishni nazort qilish bo‘limi boshlig‘i X. Maxmudov va Markazning markaziy laboratoriya mudiri U. Xasanovlar ishtirok etib, O‘zbekiston Respublikasi Prezidenti va Hukumat tomonidan urug‘lik kartoshka yetishtirish hajmini yildan yilga ko‘paytirish borasida qabul qilinayotgan qarorlar, shuningdek, kartoshka urug‘chiligini rivojlantirishda xususiy sektorning roli, bugunda urug‘lik kartoshkani sertifikatlash, saqlash va realizatsiya qilinishi bo‘yicha amalga oshirilgan ishlar yuzasidan maʼlumotlar taqdim etdilar. Markaziy Osiyoda kartoshka isteʼmoli aholi jon boshiga yillik 52,6 kg ni tashkil etadi, shuning uchun,  unga nisbatan "ikkinchi non" iborasi qo‘llaniladi.  Qolaversa, kartoshka oziq-ovqat xavfsizligi, to‘yimliligi va daromad olish uchun eng katta salohiyatga ega asosiy ekin turi hisoblanadi. Mamlakatimizning turli tuproq-iqlim sharoitlarida 150 dan oshiq kartoshka navlari yetishtiriladi. Umumiy maydoni 130 ming gektar bo‘lgan hududlarda hozirda o‘rtacha hosildorlik gektariga taxminan 22 tonna, yiliga jami hosil taxminan 2,9 mln tonnani tashkil etadi. 1,8 million tonna kartoshka ichki isteʼmol uchun ishlatiladi, 700 ming tonna hosil tabiiy va texnik vositalar tufayli yo‘qotilsa, 450 ming tonnasi urug‘lik fondi zaxirasiga jo‘natiladi, 130 ming tonnasi esa xo‘jaliklarda saqlanadi. Bundan tashqari, har yili aholi isteʼmoli uchun O‘zbekistonga taxminan, 250 ming tonna kartoshka Rossiya, Qozog‘iston, Pokiston va Belarus kabi davlatlardan import qilinadi. Uchrashuv so‘ngida Birlashgan millatlar tashkiloti oziq-ovqat va qishloq xo‘jaligi tashkiloti (FAO) ning xalqaro eksperti janob M. Chalishkan kartoshka yetishtirishda jahon tajribasi bilan o‘rtoqlashib, o‘zini qiziqtirgan bir qator savollarga Agroinspeksiya vakillaridan javoblar oldi.     Manba: "O‘zagroinspeksiya" Axborot xizmati

Davlat fuqarolik xizmatchisining ijtimoiy himoyasi haqida rolik

"Аxborot texnologiyalari asoslari" onlayn kurslarida "Oʼzagroinspeksiya" xodimlari oʼz malakalarini oshirmoqdalar

"Аgrosanoat majmuida xizmatlar koʼrsatish markazi” davlat unitar korxonasi taʼlim xizmatlarini koʼrsatish uchun Oʼzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspektsiyasi tomonidan berilgan KMO 0301-sonli litsenziya va 030171-sonli tasdiqnomaga asosan, joriy yilning 4 avgust sanasidan "Аxborot texnologiyalari asoslari" ZOOM platformasi orqali onlayn kurslarida "Oʼzagroinspeksiya"ning jami 229 ta xodimlari oʼz malaka va koʼnikmalarini oshirib kelmoqdalar. Ushbu oʼquv kurslari Markazning “Mutaxassislar tayyorlash oʼquv kurslari” tomonidan tashkillashtirilgan boʼlib, jami 30 soatlik nazariy va amaliy mashgʼulotlardan iboratdir.    

Mehnat muhofazasi va birinchi yordamni koʼrsatishda tibbiy ashyolardan foydalanish boʼyicha oʼquv seminari boʼlib oʼtdi

BIRINChI YoRDАM — baxtsiz hodisalar roʼy berganda, kishi shikastlanganda yoki toʼsatdan kasal boʼlib qolganda uning hayotini saklab qolish va yomon asoratlardan omon qolishi uchun koʼrsatiladigan tez va oddiy tadbirlar majmui; tibbiy xodim yetib kelguncha yoki ularni kasalxonaga olib borguncha amalga oshiriladi.  Shunday vaziyatlarda ish joyida toʼgʼri harakat qilish, tibbiyot ashyolari va dorilardan toʼgʼri foydalanish maqsadida joriy yilning 29 iyulь sanasida Markazning urugʼchilik yoʼnalishida mehnat muhofazasi va birinchi yordamni koʼrsatishda tibbiy ashyolardan foydalanish boʼyicha oʼquv seminari boʼlib oʼtdi. Seminarda xodimlar mehnat faoliyati davomida baxtsiz hodisalarni oldini olish, inson hayotiga xavf solganda, jaroxat olganda yoki kasal boʼlganda birinchi tibbiy yordamni koʼrsatish, jixozlar va dorilardan toʼgʼri foydalanish boʼyicha Markazning mehnat muhofazasi boʼyicha muhandisi O. Miraxmedov tomonidan seminar ishtrokchilariga batafsil maʼlumotlar berib oʼtildi.  

Joriy yil hosilidan viloyat bo‘yicha jami 17 ming 112 tonna urug‘lik don jamg‘arilgan

Qishloq xo‘jaligi ekinlaridan yuqori hosil va sifatli mahsulot olishning asosiy negizi urug‘chilikka bog‘liq bo‘lib, urug‘ bozorini shakllantirishda urug‘larni yetishtirish, qayta ishlash hamda navdorlik va ekinboplik sifatlarini nazorat qilish alohida ahamiyat kasb etadi. "O‘zagroinspeksiya"ning Namangan viloyat boshqarmasi, O‘zbekiston Respublikasi Qishloq xo‘jaligi vazirligi huzuridagi “Urug‘chilikni rivojlantirish markazi”, “Agrosanoat majmuida xizmatlar ko‘rsatish markazi” DUK viloyat filiali bilan hamkorlikda "Uchqo‘rg‘on urug‘lik don qabul qilish" shoxobchasida 2023 yil hosili uchun sifatli urug‘lik tayyorlash maqsadida saralash, tozalash, dorilash va qadoqlash hamda urug‘lik don tarqatish shoxobchalariga tarqatish bo‘yicha ko‘rgazmali o‘quv-seminari o‘tkazildi. Anjumanda taʼkidlanganidek, joriy yil hosilidan viloyat bo‘yicha jami 17 ming 112 tonna urug‘lik don tayyorlandi. Ularni belgilangan meʼyor va standart talabalariga mos ravishda saqlash bilan birga saralash, dorilash kabi yumushlar ham boshlandi. Viloyatdagi 5 ta urug‘lik donni qayta ishlash sexlarida tayyorgarlikning holati, zarur zaxiralarning yaratilgani seminarda keng muhokama qilindi. Ushbu jarayonda “O‘zagroinspeksiya” hamda “Agrosanoat majmuida xizmatlar ko‘rsatish markazi” DUK viloyat filiali mutaxassislari tomonidan standart talablar asosida sifatli urug‘lik tayyorlash maqsadida tizimli va qatʼiy nazorat o‘rnatilgan bo‘lib, urug‘lik-don tayyorlayotgan sexlarga inspeksiyaning hududiy bo‘limlari xodimlari birikitirildi va ular tomonidan davlat standarti talabi asosida urug‘lik don tayyorlash, saqlash, qayta ishlash va navlar aralashmasi bo‘yicha doimiy nazorat ishlari olib boriladi. Seminar ishtirokchilari "Uchqo‘rg‘on urug‘lik don qabul qilish" shoxobchasining mavsumga tayyorgarligi bilan yaqindan tanishdilar.    N. Isomitdinov, “O‘zagroinspeksiya” Namangan viloyati boshqarmasi bosh inspektori   Manba: agroinspeksiya.uz